Maudhui Elimishi Na Namna Yavyokuweka Karibu Na Kuleta Wateja Wapya

Maudhui Elimishi ni sehemu ndogo ya somo au ujumbe unaoandaliwa na mtu, taasisi au kampuni kwa ajili ya kuelimisha kuhusu kitu fulani anachofanya. Mfano, mwandishi anapoandika kitabu kuna maarifa, miongozo, masomo au ujumbe anaotaka jamii iujue, ijifunze na kuchukua hatua.

Maudhui elimishi yanaweza kuwa ya kifedha, kimahusano, kisaikolojia, kibiashara, kimichezo na mengine mengi kutegemeana na hadhira anayotaka mhusika iwafikie.

Kupitia maudhui elimishi kampuni au taasisi inatengeneza wateja wanaojua taarifa kuhusu bidhaa au huduma zake. Kadiri wateja wanapozidi kupata taarifa nyingi za biashara ndipo huzidi kuwa karibu nayo.

Kwenye zama hizi maudhui elimishi yana nguvu kubwa sana kwenye masoko na mauzo, kwani watu wanaweza kuijua biashara kupitia maudhui ambayo inatoa, wakayafuatilia kwa muda, wakajenga imani na kushawishika kununua. Pia, kukuletea wateja tarajiwa wengi zaidi.

Kama muuzaji maudhui unayoandaa jitahidi yasiwe na lugha ngumu nyepesi ikiwezekana yaambane na picha. Huku yakiwa yanashika umakini wake, yanafurahisha, kuelimisha, yanayohamasisha. Lengo ni kumfanya mtu anayesoma kuchukua hatua.

Njia Za Kufikisha Maudhui Elimishi Kwa Wateja Wako;

Moja; Ana kwa ana.
Unapokutana na wateja, badala tu ya kuwaambia kuhusu bidhaa au huduma unayouza, anza na kitu cha kuelimisha, hadithi ya kuhamasisha au kichekesho fulani. Hiyo inamfanya mteja awe tayari kukusikiliza kuliko ukienda tu na maelezo yako ya kile unachouza.

Mbili; Simu.
Kupitia ujumbe na kupiga simu unaweza kuanza na maudhui, hasa yale yanayonasa umakini wa mteja ili akupe muda wake. Maana wengi hawapo tayari kuendelea na mawasiliano wanayojua ni ya matangazo. Ila kama watajifunza kitu, watapata hamasa au kucheka, watakupa nafasi.

Tatu; Tovuti, Blogu na barua pepe.
Hizi ni njia bora kabisa za kutumia kusambaza maudhui, kwani yanadumu milele na kusambaa kwa wengi. Wakati kwenye ana kwa ana au simu unamweleza mtu mmoja kwa wakati, unapotumia tovuti, blogu na barua pepe, aina moja ya maudhui inawafikia watu wengi kwa wakati mmoja. Na mara nyingi watu wanaweza kuwa wanatafuta kitu mtandaoni, wakaletwa kwenye tovuti au blogu yako kutokana na maudhui yaliyopo na kuanzia hapo akawa mfuasi na hatimaye kushawishika kununua.

Nne; Mitandao ya kijamii.
Hapa ndipo sehemu rahisi ya kutengeneza wafuasi kwa kutumia maudhui. Kwa kuwa watu wengi wapo kwenye mitandao hiyo, mfano Instagram, Facebook, TikTok, LinkedIn na mingine mingi. Huko unaweza kujijengea sifa kulingana na aina ya maudhui unayotoa. Maudhui yako yakiwa mazuri yatasambazwa kwa wengi na utajenga wafuasi wengi. Mtandao wa Facebook unaonekana kuwa na wafuatiliaji wengi wa uhakika.

Tano; Vyombo vya habari.
Kupitia vyombo vya habari unaweza kutumia maudhui kutengeneza wafuasi ambao watakuja kuwa wateja wako. Mfano kuwa na nafasi ya kuandika makala kwenye magazeti kuhusu mambo yanayoendana na biashara yako, kupata vipindi maalumu kwenye TV na redio ambapo wengi wanakujua kupitia njia hizo.

Sita; Semina Na Mikutano Mbalimbali.
Hapa unaelezea kiufupi kuhusu biashara yako na namna watu wanavyoweza kupata taarifa zako. Mara nyingi watu hutaja majina yanayopatikana katika mitandao yao ya kijamii au tovuti zao.

N.B Maudhui elimishi ni uwekezaji wa muda mrefu. Siyo kwamba ukishaandaa maudhui ya aina moja basi wateja watakukimbilia kutaka kununua, unahitajika kuandaa maudhui mengi na kwa muda mrefu mpaka kufikia hatua ambayo wateja wanakuwa wamekutana na maudhi yako mengi kiasi cha kukuamini na kuwa tayari kununua kwako.

Zingatia mada kuu ya mazungumzo wakati wa uandaaji wa maudhui yako. Pamoja na wateja wako lengwa.

Kwa hayo na mengine mengi usikose kutufuatilia hapa hapa. Pia, kupata vitabu vyetu na kujiunga kwenye programu yetu ya Chuo Cha Mauzo. Tuwasiliane 0767702659 au mkufunzi@mauzo.tz

Imeandaliwa na Lackius Robert, Mkufunzi Wa Mauzo na Mwandishi.
Karibu tujifunze zaidi.